"KATONG dua tarlaen kalo mo bacarita musti dudu di dadegu. Apa lai kalo su ada kopi deng kokis, mo baomong apa sa bisa na. Mo dudu dar pagi sampe katumu pagi, sond ada yang lawan. Sakarang be rasa, urat kaki dong ke asam. Bet taku kana panyaki asam urat," Ama Tobo kastau dia pung kawan Ba'i Ndu.
"Na...kalo bagitu, katong dua jalan kaliling kampung sa. Mari su katong jalan," Ama Tobo ajak Ba'i Ndu.
Dong dua mulai jalan. Ama Tobo angka kain feo di leher. Dia pung parte Ba'i Ndu ju son mo kala. Baptua ju angka kain feo di kapala. Ba'i Ndu pake calana tarening warna kuning.
Lia dong dua bajalan, Ama Tobo pung bini Ina Feek batarea dar dalam rumah. "Wooeee.. basong du mo pi mana lai. Bet su eok ini kopi, basong dua bajalan."
"Ma simpan sa itu kopi. Sabantar bar katong minom. Katong mo bajalan kaliling kampung," Ama Tobo manyao dia pung bini.
"Auwiiii....,pung gumuk lai. Adiiii...,dia pung badan pung gaga lai. Kalo be dapa sang dia. Be urus sang lu mati pung. Lu hanya tunggu makan deng tidor sa. Samua be urus na. Bet kas mandi tarus. Mo pagi, siang, malam, bet kas mandi. Biar ko lu badan tamba bakincang. Lu pung tai sa bet angka na. Awis badan bagus bagini mo cari dimana oooo," Ama Tobo kasi komentar tiba-tiba.
Ba'i Ndu langsung sambar. "Woeee....,dasar mata karanjang. klo mo masnanaok na lia-lia dolo, Itu orang pung ana. Lu jang manoso sambarang. Tau diri sadiki. Su tua hola, masi masnanaok sond tau diri. Woe, lu pung lutut sa su tinggal dia pung tampurung karing. Itu mata jang ke karanjang," Ba'i Ndu protes Ama Tobo.
Ba'i Ndu pung pikiran Ama Tobo baomong ana parampuan dong. Ais pas dong dua lewat, ada ana parampuan dong lewat di dong pung muka.
"Kawan yang mata karanjang, lu pu maksud sapa...?? Beta rasa, kawan jang banile orang kalo balom tau orang pung maksud. Bet ju tau diri. Untuk apa kas komentar orang pung ana. Itu namanya dosa," Ama Tobo kas jalas Ba'i Ndu.
"Jadi ente omomg sapa lai," Ba'i Ndu tanya Ama Tobo.
"Tenga lima meter lai, ketong su sampe. Nanti be kas kanal sang lu. Pasti ente sanang mo mati." Pas deka sapi, Ama Tobo kas tau, "Ini dia kawan."
Tidak ada komentar:
Posting Komentar